Meistaravetur Svartra Sunnudaga

Svartir sunnudagar hefja göngu sína í Bíó Paradís þann 10. september og verður þessi vetur helgaður fjórum meisturum kvikmyndanna. Þetta eru þau Andrei Tarkovsky, David Lynch, Kathryn Bigelow og Chan-wook Park. Áætlað er að sýna sem flestar kvikmyndir frá ferli þessara meistara og munu leikar hefjast með Æsku Ívans eftir Tarkovsky. Sunnudaginn 17 september verður svo sýndur frumburður Davids Lynch, hin ótrúlega Eraserhead frá árinu 1977 – en það verður líklega í fyrsta sinn sem sú mynd er sýnd opinberlega í íslensku kvikmyndahúsi síðan á Kvikmyndahátíð Listahátíðar í Regnboganum árið 1982. Kathlyn Bigelow á svo leik þann 24 september með hinni klassísku vampýrumynd sinni, Near Dark og þann 1. október er röðin komin að hinum Suður Kóreska Chan-wook Park og fyrsta verkinu í þrílek hans um hefndina, Sympathy for Mr. Vengeance. “Meistaravetur” Svartra sunnudaga mun svo halda áfram fram að páskum þar sem sýndar verða hver perlan á fætur öðrum eftir þessa fjóra ágætu meistara.