Mizra er 83 ára og vill vegabréf svo hann geti snúið aftur til Kúrdistan til að heiðra minningu barnanna tíu sem hann hefur misst. Hann hefur reynt allt en ákveður loks að skrifa bréf til konungs, ljóðrænt og átakanlegt bréf, fullt af sársauka og visku. Hann er þó aðeins einn af sex hælisleitendum sem myndin fjallar um – öll eru þau í dagsferð til Osló þar sem þau sinna ýmsum erindum. Beritan er einstæð móðir í leit að hefnd, Champion er bardagalistamaður í leit að vinnu, Miro er miðaldra sjarmör í leit að ástinni, Zirek er unglingspiltur sem týnir litlu frænku sinni sem hann átti að passa og Akbar reynir að innheimta launin sín áður en honum er vísað úr landi.

Hisham Zaman er norsk-kúrdískur leikstjóri sem kom sem flóttamaður til Noregs á táningsaldri. Þetta er önnur myndin hans í fullri lengd. Frumraunin var vegamyndin Áður en snjórinn fellur (Før snøen faller), mynd sem fylgir kúrdum á ferð sinni frá Írak til Noregs – þar sem leið þeirra liggur í gegnum Tyrkland, Grikkland og Þýskaland. Zaman sló hins vegar upphaflega í gegn með stuttmyndinni Bawke, sem hlaut tugi alþjóðlegra verðlauna. Myndin vann aðalverðalaun á Kvikmyndahátíðinni í Gautaborg 2014. Sverrir Kristjánsson klippti myndina.