Bíó Paradís hefur stórbætt aðgengi síðastliðið ár þar sem búið að setja upp ramp inn í sal 1, lyftu inn í sal 2 og 3. Hjólastólastæði eru í öllum sölum og salerni fyrir hreyfihamlaða er komið í notkun. Fólk í hjólastólum fær frítt í bíó. Allir aðstoðarmenn og liðveisla fá frítt í bíó með sínum skjólstæðingum.
Bíó Paradís býður upp á tónmöskva í sal 1 og er á áætlun að koma upp búnaði í sal 2 og 3 á árinu 2024. Einnig er boðið reglulega upp á sjónlýsingar, skynvænar sýningar og sýningar fyrir ólíkar þarfir fólks og fjölbreytta hópa. Bíó Paradís eru þess utan Heilavinir í samstarfi við Alzheimersamtökin. Nánar um Heilavini hér:
Páskasýning Heilavina á Hárinu – Frítt inn sjá nánar hér:
Skynvæn páskasýning á Vélmennadraumum – Frítt inn sjá nánar hér:
Snerting með sjónlýsingu – afmælissýning Blindrafélagins sjá nánar hér:
Nánar um samstarfið við Inclucine hér:
Bíó Paradís býður nú uppá bíó í björtu á öllum miðvikudögum kl 14 fyrir alla sem vilja komast í bíó að degi til. Tilvalið fyrir eldra fólk, fólk sem vinnur á kvöldin og alla þá sem vilja auka félagslega virkni í öruggu og skemmtilegu umhverfi.
Bíó Paradís býður 25% afslátt fyrir nema, öryrkja og eldri borgara. Afslátturinn fæst í miðasölu á staðnum en ekki á vefnum. Hverskyns hópar og félagsstarf sérstaklega velkomnir. Miðvikudagsbíó er í samstarfi við Laugarásinn geðmeðferðardeild, Hlutverkasetrið og teymi fyrir umsækjendur um alþjóðlega vernd.
Nánar um Miðvikudagsbíó hér:
Bíó Paradís hlýtur Samfélagsglampa Blindrafélagsins 2024.
Í tilefni af 15. október sem er alþjóðlegur dagur hvíta stafsins ákvað stjórn Blindrafélagsins að veita Bíó Paradís Samfélagslampann „fyrir brautryðjendastarf í aðgengi fatlaðra að menningarviðburðum og að opna aðgang blindra og sjónskertra að sjónlýstum kvikmyndum“ sem var afhentur Hrönn Sveinsdóttur framkvæmdastjóra Bíó Paradís.
Í tilkynningu Blindrafélagsins segir „Eins og flest öllum er kunnugt hefur Bíó Paradís lyft grettistaki við að stórbæta aðgengi fatlaðs fólks að bíóinu. Bíó Paradís hefur verið frumkvöðull í því að sýna myndir með íslenskri sjónlýsingu í gegnum smáforritið MovieReading. Sjónlýsingar hafa verið að ryðja sér til rúms víða erlendis. En sjónlýsingar opna aðgengi blindra og sjónskertra að margskonar viðburðum og stórbæta upplifun þeirra. Sjónlýsing lýsir í töluðu máli því sem fyrir augu ber. “,
Hrönn Sveinsdóttir, framkvæmdastjóri Bíó Paradís veitti verðlaununum viðtöku þann 15. október 2024 á Alþjóðlegum degi Hvíta Stafsins en Sigþór U. Hallfreðsson formaður Blindrafélagsins afhenti henni Samfélagsglampann.
Ljósmynd: Ruth Ásgeirsdóttir. Guðni Th. Jóhannesson, forseti Íslands og Hrönn Sveinsdóttir, framkvæmdastjóri Bíó Paradís.
Bíó Paradís hlaut hvatningarverðlaun ÖBÍ 2023. Bíó Paradís hlýtur verðlaunin fyrir frumkvæði að því að efla aðgengi fyrir alla með sérstöku tilliti til ólíkra hópa.
„Eins og við vitum skiptir menning, þátttaka og samvera miklu máli fyrir samfélagið. Það er bensínið okkar og gerir okkur að þeim sem við erum. Þess vegna hefur það verið okkur svo mikið kappsmál að fá alla fjölbreytta hópa samfélagsins inn. En ávinningurinn er allur okkar megin því menningarlega auðmagnið sem við fáum inn frá því að geta boðið alla velkomna er okkar megin,“ sagði Hrönn Sveinsdóttir, framkvæmdastjóri Bíó Paradís þegar hún veitti verðlaununum móttöku.
Bíó Paradís hlaut aðgengisviðurkenningu Reykjavíkurborgar 2024 en viðurkenningin var kunngjörð á opnum fundi aðgengis- og samráðsnefndar í málefnum fatlaðs fólks sem fram fór á Sjóminjasafninu í mars 2024.Viðurkenningin er veitt þeim einstaklingum, hópum, félagasamtökum, fyrirtækjum eða stofnunum sem á eftirtektarverðan hátt hafa staðið vörð um gott aðgengi með fjölbreyttum hætti.
Viðurkenninguna hlýtur Bíó Paradís fyrir að hafa stórbætt aðgengi fatlaðs fólks með fjölbreyttar aðgengisþarfir að kvikmyndahúsinu. Húsnæði Bíó Paradís við Hverfisgötu var gert aðgengilegt og haldnar hafa verið sýningar sem henta sérstaklega einhverfu, heyrnarskertu og sjónskertu fólki. Í kvikmyndahúsinu eru einnig haldin Miðvikudagsbíó í samstarfi við Laugarás meðferðargeðdeild, Teymi Reykjavíkurborgar um alþjóðlega vernd og neyðarskýlin. Bíó Paradís fór af stað með þessar breytingar á bættu aðgengi að sýningum og húsnæðinu að eigin frumkvæði og eru til fyrirmyndar þegar kemur að inngildingu þjónustu.
Bíó Paradís hlýtur aðgengisviðurkenningu Reykjavíkurborgar. F.v. Elísabet Guðrúnar og Jónsdóttir formaður, Hrönn Sveinsdóttir, framkvæmdastjóri Bíó Paradís og Ása Baldursdóttir dagskrárstjóri Bíó Paradís.
Bíó Paradís hlýtur Fjólublátt ljós við barinn
Fjólublátt ljós við barinn, aðgengisviðurkenning UngÖBÍ (ungliðahreyfingar ÖBÍ réttindasamtaka), var afhent í fyrsta sinn þann 27. ágúst 2024 við hátíðlega athöfn. Bíó Paradís er handhafi viðurkenningarinnar í ár, en viðurkenningin er afhent þeim sem stuðla að bættu aðgengi fatlaðs fólks að skemmtanalífi á Íslandi.
Eiður Welding, formaður UngÖBÍ, veitti Hrönn Sveinsdóttur, framkvæmdastjóra Bíó Paradísar, viðurkenninguna, sem er einmitt fjólublátt ljós við barinn eins og sjá má á meðfylgjandi mynd. Í kjölfar afhendingarinnar var gestum boðið á partísýningu á stórmyndinni Mamma Mia.
Aðgengi að skemmtanalífi, svo sem veitinga- og skemmtistöðum og annarri afþreyingu, er verulega ábótavant á Íslandi en partíið er auðvitað skemmtilegra þegar öll eru með.
Hrönn Sveinsdóttir, framkvæmdastjóri Bíó Paradísar, sagðist ákaflega ánægð með viðurkenninguna. „Ég er komin með harðsperrur í munnvikin því við erum svo glöð yfir þessu.“
Í ávarpi sagði Hrönn frá því að það geti verið fjarskalega erfitt að breyta húsum, kaupa lyftur og gera þau aðgengileg fyrir sem allra flesta. Starfslið Bíó Paradísar hafi fengið aðgengi á heilann og haft sig fram við að gera bíóhúsið sem aðgengilegast fyrir alla hópa. Unnið hafi verið að því að gera sýningar aðgengilega fyrir t.d. einhverft fólk og fólk með ADHD, settir hafi verið upp tónmöskvar og gerðar sjónlýsingar á myndum.
„Það er okkar hagur að sem flestir komi í þetta hús og líði eins og þeir séu velkomnir, að það sé gert ráð fyrir þeim.“
Hrönn Sveinsdóttir, framkvæmdastjóri Bíó Paradís, veitti verðlaununum viðtöku við hátíðlega athöfn að viðstöddu fjölmenni frá UngÖBÍ.
Styrktaraðilar
