Fréttir

Ævintýrin allt um kring í Cannes

31/05/2019

Ása Baldursdóttir, dagskrár- og kynningarstjóri hjá Bíó Paradís, skellti sér á kvikmyndahátíðina í Cannes á dögunum, þar ræddi hún við Elín Albertsdóttir frá Fréttablaðinu um hátíðir, kvikmyndir og hvað er framundan hér hjá okkur í Paradísinni 

Eftirfarandi grein birtist í Fréttablaðinu föstudaginn 24. maí 2019 (upprunaleg grein er HÉRNA!)

Ása Baldursdóttir segir að það sé einstaklega skemmtilegt að vera á kvikmyndahátíðinni í Cannes. Sannkallaður glamúr og glæsileiki.

Ása hefur starfað hjá Bíó Paradís í sex ár og segist vera í draumastarfinu enda eru áhugamálin kvikmyndir, sjónvarpsþættir, uppistand og myndlist ásamt fleiru. Hún segist líka hafa sérstakan áhuga á fólki. „Það er eitthvað við góðar sögur sem kveikir í manni neista. Heimurinn er grimmilegur og því er mikilvægt að koma erfiðum og flóknum sögum á framfæri,“ segir hún.

Það hefur verið mikill uppgangur hjá Bíó Paradís en það er fyrsta listræna kvikmyndahúsið hér á landi. Þar eru partísýningar, prjónasýningar og alls kyns gamlar og nýjar kvikmyndir sýndar. „Íslendingar ólust upp með amerískum bíómyndum. Í Bíó Paradís fær fólk aðgengi að öðrum kvikmyndum, norrænum, evrópskum og í raun frá öllum heimshornum. Það er mikil veisla. Auðvitað tekur tíma að byggja upp „Arthouse“ eins og það kallast á ensku, en við greinum mikinn áhuga. Við erum líka að sýna költ klassík alla sunnudaga á veturna þar sem þeir Hugleikur Dagsson, Sigurjón Kjartansson og Sjón stýra valinu og nýr listamaður er valinn hvern sunnudag til þess að endurgera plaköt,“ segir Ása.

Þá má ekki gleyma sýningunum fyrir skólabörn undir leiðsögn Oddnýjar Sen. „Tilgangurinn er að veita börnum og unglingum möguleika á að kynnast kvikmyndum sem hafa alþjóðlega gæðastimpla, eru margar klassískar perlur frá öllum skeiðum kvikmyndasögunnar, lykilkvikmyndir sem hafa skapað sér sess innan kvikmyndasögunnar. Þetta er gríðarlega mikilvægt fyrir komandi kynslóðir og við erum afar stolt af því að stuðla að auknu aðgengi og kvikmyndalæsi.“

Vinsælar myndir

Þegar Ása er spurð um vinsælustu myndirnar nefnir hún Paradís: „Ást sem fjallar um kynlífstúrisma í Afríku. Hún sló svo rækilega í gegn að við þurftum sífellt að bæta við sýningum enda stórkostleg mynd. Önnur sem ég man eftir var Force Majure eftir Ruben Östlund, gamanmynd sem fjallaði um miðaldra karlmann í tilvistarkreppu. Annars erum við að sýna klassískar nostalgíumyndir á hverjum föstudegi sem geta verið mjög vinsælar.“

Aðalhöllin í Cannes. 

Ása segir að starfið sé gríðarlega fjölbreytt. „Það er eins og við Hrönn Sveinsdóttir framkvæmdastjóri séum með kvikmyndahátíð 365 daga ársins. Við vinnum gríðarlega vel saman, jafnt heima sem á ferðalögum. Við vorum einmitt að minnast þess þegar við vorum staddar hér í Cannes í fyrsta skipti fyrir sex árum og ræddum við bandaríska dreifingaraðila amerískrar geimverumyndar sem báru í okkur drykki og dýr kampavín. Ég sagði að þetta væri einhver misskilningur, við værum listrænt kvikmyndahús en þeir svöruðu bara nei, nei, þið borgið ekki fyrir drykkina hér. Þeir töluðu um hversu margir hefðu komið til Íslands að skoða geimverur við Snæfellsjökul árið 1996,“ segir Ása og hlær að minningunni. „Hérna í Cannes horfir maður stöðugt á kvikmyndir. Þetta er besta tækifærið til að sjá sem mest. Ég vakna á hverjum degi og get ekki beðið eftir að sjá og upplifa nýja kvikmynd,“ segir hún.

Ísland vekur athygli

„Íslensk kvikmyndagerð er að gera það mjög gott á alþjóðavísu. Ég gleymi því ekki þegar við unnum í fyrsta skipti á Cannes með kvikmyndinni Hrútum eftir Grím Hákonarson. Þá stóð Isabella Rosselini á sviðinu og sagði með skrítnum hreim „The winner is, Hrútar“. Þá fékk ég gæsahúð. Einnig sá ég myndina Kona fer í Stríð hér í fyrra þar sem fagnaðarlátunum og lófaklappinu ætlaði aldrei að linna þegar hún vann til verðlauna á frumsýningunni. Þá var stórkostlegt að fylgjast með kvikmynd Hlyns Pálmasonar, Hvítur, hvítur dagur, þar sem Ingvar E. Sigurðsson var að vinna verðlaun sem besti leikarinn, en myndin hlaut einnig fleiri verðlaun. Ég get sagt með sanni að hvert sem ég fer, þá er mjög mikill áhugi á íslenskum kvikmyndum og því ber að fagna,“ segir Ása.

Grét í bíó

Þegar hún er spurð hvort einhverjar myndir séu að slá í gegn núna, svarar hún því játandi. „Ég sá mynd eftir stórleikstjórann Ken Loach sem heitir Sorry We Missed You. Ég grét á sýningunni, sem hefur ekki gerst í nokkur ár og myndin situr í mér. Ég hef séð alveg frábærar kvikmyndir sem ég vona að við getum fært íslenskum kvikmyndahúsagestum. Annars er Once Upon a Time in Hollywood í leikstjórn Tarantinos að slá í gegn eins og greint hefur verið frá, enda var klappað í heilar sjö mínútur eftir frumsýninguna og myndin hlaðin stjörnum. Svo er mikið talað um Elton John-myndina, Rocket Man, en eftir frumsýninguna á henni var óvænt partí á ströndinni með tónlistaratriðum. Það var mjög skemmtilegt.

Leikarar úr myndinni Once Upon A Time in Hollywoood, Leonardo DiCaprio, Margot Robbie, Daniella Pick, leikstjórinn Quentin Tarantino og Brad Pitt. 

Stjörnurnar allt í kring

Það er stórkostleg upplifun að vera hér í Cannes. Ég get eiginlega ekki líst því betur en að ævintýrin séu ávallt handan við hornið, maður hittir alltaf einhvern áhugaverðan,“ upplýsir Ása og þá er ekki úr vegi að spyrja hvort hún hafi hitt einhverja fræga núna. „Í fyrra gengum við Pétur Gunnarsson, maðurinn minn, fram á Woody Harrelson. Það var mjög skrýtið. Ég var á sama veitingastað og Tarantino eitt kvöldið núna og það var mjög sérstakt en ég hafði náttúrlega ekki mikið tilefni til að ræða við hann, enda er þetta bara fólk þótt stjörnur séu. Mig langaði þó að ræða við hann því hann var eitt sinn á Íslandi að sýna uppáhaldskvikmyndirnar sínar sem mótuðu hann sem listamann. En það samtal átti sér ekki stað,“ segir Ása og bætir við að stjörnurnar haldi sig mikið út af fyrir sig. „Rauði dregillinn í ár hefur verið hlaðinn stjörnum eins og Bill Murray, Adam Driver, Chloë Sevigny, Tilda Swinton, Selena Gomez, og Tom Waits. Svo voru það Leonardo DiCaprio, Brad Pitt, Margot Robbie og Tarantino og svo mætti lengi telja. Það er mikill spenningur fyrir verðlaunaafhendingunni og hver hreppir Gullpálmann á Cannes 2019.“

Glamúr og lúxus

Ása segir að jafnan sé mikill glæsibragur á hátíðinni. Það geti hins vegar verið krefjandi enda mikill hraði. „Þetta er stórkostlegt allt saman og fólk er oftast alveg uppgefið eftir hátíðina. Glæsibragurinn felst aðallega í hversu mikil virðing er borin fyrir frumsýningum á kvikmyndum, hvað þetta er stórt móment fyrir alla þá fjölmörgu sem komu að myndunum. Í Cannes snýst allt um glamúr, allt frá búðum og hönnuðum yfir í snekkjur og veitingastaði. Þetta er einstök hátíð með mikinn sjarma. Það er mjög dýrt að vera hér á Frönsku rívíerunni. Betlararnir eru meira að segja margir í designer fötum,“ segir hún.

Týndur galakjóll

„Við Hrönn gistum núna í fyrsta skipti í gamla bænum í Cannes, þar eru margir spennandi veitingastaðir. Sjávarréttir eru mjög ferskir og vinsælir. Maturinn er frábær og ég hef nú þegar borðað á tveimur stöðum sem eru með Michelin-stjörnu.

„Ég var svo óheppin að taskan mín týndist á leiðinni hingað og ég þurfti að kaupa mér nauðsynlega hluti og föt. Galakjóllinn og skór sem mamma mín gaf mér eru í töskunni og allir mínir dýrmætustu skartgripir. Ég fékk skilaboð um að hún væri fundin en því miður voru það mannleg mistök og rangar upplýsingar. Ég hef þá trú að ef ég hugsa jákvætt og reyni að hlæja að öllum þessum skrítnu símtölum sem ég hef þurft að standa í til að finna hana – þá finnist hún að lokum. Það verður líklegast ekki fyrr en ég kem heim.“

Eurovision-partí

Ása segir að það hafi enginn áhugi verið fyrir Eurovision um síðustu helgi í Cannes og ekki fundu þær stöllur bar til að horfa á keppnina. „Við enduðum í íbúðinni okkar með pínulítið sjónvarp. Vinir mínir sem eru á Evrópureisu keyrðu hingað frá Barcelona til að horfa á Eurovison með okkur og áður en við vissum var vænn hluti Íslendinga sem eru hér í Cannes kominn til okkar að horfa á Hatara. Ég efast um að einhver önnur þjóð hér á Cannes hafi tekið sér frí eitt kvöld frá þessari einni stærstu kvikmyndahátíð í heimi til þess að horfa á Eurovision.“

Kvikmyndin Rocket Man vakti mikla athygli. Hér eru þeir Sir Elton John og Taron Egerton, söngvari og leikari, sem fer með hlutverk poppstjörnunnar. 

Þegar Ása er spurð hvað taki við þegar heim kemur og hvort eitthvað nýtt sé á döfinni í Bíó Paradís, segir hún að það sé alltaf eitthvað nýtt og skemmtilegt að gerast. „Ég get ekki einu sinni talið upp allt það sem er nýtt hjá okkur. Við erum að undirbúa eitt stórkostlegasta haust sem við höfum boðið upp á hingað til. Nýjungarnar felast í því hvaða viðburði við bjóðum upp á eða kvikmyndir sem við frumsýnum. Það eru tvö ár síðan við fórum að bjóða upp á sýningar á nýjum pólskum kvikmyndum sem eru sýndar á sama tíma hér og í Póllandi. Þær hafa slegið rækilega í gegn og við erum að kanna hvort við getum sýnt litháískar kvikmyndir. Við bjóðum alltaf upp á íslenskar kvikmyndir með enskum texta og reynum að auka framboðið einmitt yfir sumartímann fyrir erlenda ferðamenn,“ segir Ása en hún og maður hennar, Pétur, eiga soninn Hólmstein, sem verður ársgamall í ágúst svo það verður gaman fyrir hana að koma heim og hitta gullmolann sinn.

Skoða fleiri fréttir

Fréttir

Af jörðu ertu kominn // Cosmic birth – 50 ára afmæli tungllendingar 20.júlí

Mánudjass í Bíó Paradís í sumar

Ævintýrin allt um kring í Cannes